Video
Read full review
2024-03-07
2366 views
ULURU📍灣仔春園街1-11號春暉大廈1樓之前同大家分享過，自從我返咗新工之後，朋友就經常同我約喺放工後一齊食晚飯。如果時間好趕，我哋就會快食粥呀、米線呀、拉麵之類；如果時間許可，就會物色一啲可以坐耐啲嘅地方，例如西餐、燒烤或cafe。今晚我提早book咗位於春園街嘅ULURU，一間人氣非常嘅2D黑白打卡cafe，同朋友撐下檯腳。揀呢間cafe嘅其中一個原因，就係最近喺ig見到好幾款佢哋出品嘅甜品，每款都各有特色，而且造型特別，好打卡able。 💰$258烤焗美國豬鞍扒 🐖我同朋友一人揀咗一個main嚟share，我嘅選擇係店員推介嘅烤焗美國豬鞍扒。豬鞍扒嘅份量好足，足足佔咗餐碟嘅2/3，仲有烤焗雜菜同蘋果蓉伴碟，擺盤十分精美。烤焗過嘅薯仔外脆內軟、西蘭花夠晒多汁、類像法邊豆嘅豆類清脆爽口，即使係配菜但一啲都唔不馬虎。主角豬鞍扒外焦內嫩，因為處理得剛剛好，所以用刀叉輕輕一切，扒肉就隨隨落下，非常鮮嫩多汁，口感極佳。平時食肉，只要有脂肪，我就會整走咗先食。但食呢塊扒就唔需要咁做，儘管扒肉同脂肪相連，但因為脂肪已經過烤同焗既過程，基本上係入口即化，食每一啖都品味到豬肉嘅油香，沾燒汁嘅同時
📍灣仔春園街1-11號春暉大廈1樓
之前同大家分享過，自從我返咗新工之後，朋友就經常同我約喺放工後一齊食晚飯。如果時間好趕，我哋就會快食粥呀、米線呀、拉麵之類；如果時間許可，就會物色一啲可以坐耐啲嘅地方，例如西餐、燒烤或cafe。
今晚我提早book咗位於春園街嘅ULURU，一間人氣非常嘅2D黑白打卡cafe，同朋友撐下檯腳。揀呢間cafe嘅其中一個原因，就係最近喺ig見到好幾款佢哋出品嘅甜品，每款都各有特色，而且造型特別，好打卡able。
[價錢 Price]
💰$258
烤焗美國豬鞍扒 🐖
我同朋友一人揀咗一個main嚟share，我嘅選擇係店員推介嘅烤焗美國豬鞍扒。豬鞍扒嘅份量好足，足足佔咗餐碟嘅2/3，仲有烤焗雜菜同蘋果蓉伴碟，擺盤十分精美。烤焗過嘅薯仔外脆內軟、西蘭花夠晒多汁、類像法邊豆嘅豆類清脆爽口，即使係配菜但一啲都唔不馬虎。
主角豬鞍扒外焦內嫩，因為處理得剛剛好，所以用刀叉輕輕一切，扒肉就隨隨落下，非常鮮嫩多汁，口感極佳。平時食肉，只要有脂肪，我就會整走咗先食。但食呢塊扒就唔需要咁做，儘管扒肉同脂肪相連，但因為脂肪已經過烤同焗既過程，基本上係入口即化，食每一啖都品味到豬肉嘅油香，沾燒汁嘅同時配上少少蘋果蓉一齊食，能中和油滯感，整道菜基本上不能挑剔。
[價錢 Price]
💰$288
慢煮羊膝伴野菌意大利飯 🐏
而朋友就選擇咗慢煮羊膝伴野菌意大利飯，本來我哋都以為個risotto係白汁嗰種，估唔到同肉味濃郁嘅羊膝又出奇哋夾喎。雖然risotto整體唔算好creamy，口感亦偏硬，但味道方面真係幾出色。
我會咁講係因為佢嘅味道濃郁，除咗食到雜菌，紅椒黃椒嘅味道亦好出，sauce亦非常濃香，唔配羊肉就咁單獨食都已經好滋味。而至於羊膝，份量大就已經唔洗講，再加上好濃稠嘅醬汁，帶出羊肉嘅鮮味，但唔會食到羶味。羊膝肉大部份都煮得入味腍身，厚肉哋嘅位置會結實少少，但又唔會過乾過硬，我哋認為絕對值得一試。
[價錢 Price]
💰$118
富士之櫻祭 🗻
終於寫到我心目中今餐嘅主角，甜品啦，真係好想將我哋食用時最真實嘅感覺同大家分享！第一道要介紹嘅係富士之櫻祭，相信造型美觀特別就唔需要我多講啦，但我哋真係好欣賞設計呢款甜品嘅人嘅用心。
小小嘅綠茶富士山丘上，座落一座神社，山腳位置有泥土同散落一地嘅花瓣，畫面唯美有詩意，亦有濃濃嘅和風，在場食客基本每檯都會叫嚟食。呢款造型咁靚嘅甜品，其實係以mascarpone cheese同丸久小山園綠茶粉，打造嘅雙色Tiramisu，內餡方面有焙茶手指餅，圍邊仲有大量用曲奇碎整成嘅crumble，好睇又好食。
Tiramisu唔似一般幼滑嘅感覺，反而有少少似奶凍嘅口感，相信係想模仿山嘅造型而整得挺身少少。用上盛嘅日本產綠茶粉整嘅，綠茶味難怪會咁濃郁啦，茶味無丁點苦澀，完美融入Tiramisu內，大家嚟到一定要叫返個呀！
[價錢 Price]
💰$128
嚕嚕米－森の家
細個有鍾意過姆明嘅我，居然一直無留意佢間屋到底係點既！為咗求證，我真係有google過㗎，雖則同姆明間屋嘅外形有啲分別，但都離不開蘑菇嘅theme。朋友指明要叫呢款咁可愛嘅甜品嚟食，真係好少有，睇嚟佢嘅吸引力真係好大喎！
我想大家留意一下蘑菇莖嘅位置，見到上面啡啡哋嘅地方嗎，係咪好似真係喺泥土內生長出嚟嘅菇咁呢？連呢啲細節都咁俾心機去整，呢個價錢真心抵俾。呢間蘑菇屋主要係由草莓乳酪、草莓果茸、海綿蛋糕同白朱古力整成，草莓類嘅食材帶有酸味，用返相對較甜嘅白朱古力就可以平衡返味道，真係有深思熟慮過喎。
蘑菇底同樣有以曲奇碎整成嘅crumble，但心思位就係cafe選用咗朱古力同抹茶味嘅曲奇去整，所以驟眼望落就好似真正嘅濕泥一樣。再喺上面放上食用花同細葉，幾可亂真！
[價錢 Price]
💰$52
Uluru玫瑰茶 🌹
Rose tea應該係呢度嘅siugnature drink，又係每檯都會見到佢嘅身影嘅item。中等價位但咁大杯造型咁靚，未飲就已經覺得好有好感。佢主要係由玫瑰茶、士多啤梨puree、玫瑰糖漿做base，再以鮮玫瑰同rosemary裝飾，飲落有玫瑰嘅幽香，同syrup嘅甜味，顏色鮮艷搶眼，相信好多女士都會鍾意。
[價錢 Price]
💰$38
綠茶拿鐵 🍵
我自己就叫咗我至愛green tea latte，無複雜嘅拉花，但有隻好可愛嘅大眼仔，睇到即刻會心微笑。Latte奶味香醇，綠茶茶味芳香，呢個價錢有咁大杯，性價比好高！
Post
